Da kloane Oskar wackst im Danzig da Zwanzigajoa auf ois Sohn vo da Agnes undm Alfred Matzerath. Oda vo da Agnes Matzerath und am Jan Bronski. Des woisa seiba ned so genau. An seim drittn Gebuadsdog kriagta vo seine Mama a Blechdrome gschenkt und bschliast, dassa nimma wachsn wui. Späda hoasts dann da Alfred sei schuid, wei a de blede Kellerlukn ofglassn hod. Sei Drome gibda seidem nimma hea und wenna dafüa ois kapud schrein muas. Sei Mama bringd si a boa Joa späda mid a bissl zvui Fisch um, weis wieda schwanga ís. Am Voaomd vom zwoadn Weidkriag bringda Oska an Jan in die poinische Bost, de aba bleeda Weise am nächstn Dog vo de Nazis belagad wead und de macha kuazn Prozess midm Jan. Da Alfred stead dan in seim Lon in Danzig de Marie ei, weias aloans ned schafft. De kriagt dann a Kind vom Alfred. Oda vom Oska. Des wois da Oska seiba ned so genau. Nachdem da Oska kuaz duach ganz Europa greist is im Dienste dea Wehrmacht, kumd da Russ nach Danzig und da Nazi Alfred hod koa Chance gega sei Parteiabzeichn. Am Grob vo seim Vada bschliast de Oska doch wiede zum wachsn. Da Oska und d'Marie miasn nach Westn flian. Do obada zerscht ois Modl, dann ois Musika, bevora ind Klapsn brochd wead, weia angeblich wen umbracht hod. Do schreibda dann den ganz Mist auf sodassma hod nei wissn wea da kloane Oska Matzerath gwen is.